काठमाडौं – रसुवास्थित भोटेकोशी नदीमा आएको भीषण बाढीबाट ठूलो मानवीय क्षति भएपछि भारतीय अभिनेता तथा समाजसेवी सोनु सुदले नेपाललाई सक्दो सहयोग गर्ने बताएका छन् ।

सोनु सुदले सामाजिक सञ्जालमार्फत नेपालका बाढी प्रभावित नागरिकप्रति सहयोगको प्रतिबद्धता व्यक्त गरेका हुन्। उनले खाद्यान्न, आश्रय तथा पुनःस्थापनामा सहयोग गर्ने बताएका हुन् ।

सोनु सुदले आफ्नो सन्देशमा नेपाल एक्लो नरहेको उल्लेख गर्दै कठिन परिस्थितिमा सहयोगका लागि आफूहरू अघि बढ्ने बताएका छन् । बाढीपछि नेपालमा राहत तथा उद्धारका प्रयास भइरहेका बेला विभिन्न देश तथा अन्तर्राष्ट्रिय स्तरबाट समेत सहयोग र ऐक्यबद्धता जनाउने क्रम सुरु भएको छ।

नेपाल प्रहरीका अनुसार बुधबार साँझ ७ बजेसम्म बाढीमा परी ९५ जनाको मृत्यु भएको पुष्टि भएको छ। प्रभावित क्षेत्रमा खोज तथा उद्धार कार्य जारी छ।