काठमाडौं– सरकारले तिब्बतबाट नेपालतर्फ आएको बाढीबाट प्रभावितको खोज तथा उद्धारका लागि रसुवा र नुवाकोटमा नेपाली सेना र निजी क्षेत्रका १३ वटा हेलिकप्टर परिचालन गरेको जनाएको छ ।  

बुधबार प्रतिनिधिसभा बैठकमा खोज तथा उद्धारका लागि भएका कामका बारे जानकारी गराउँदै परराष्ट्रमन्त्री शिशिर खनालले प्रभावकारी रुपमा खोज तथा उद्धारका लागि सरकार गम्भीर रहेको भन्दै नेपाली सेना र निजी क्षेत्रका १३ वटा हेलिकप्टर परिचालन गरेको जानकारी दिएका हुन् । 

रसुवा त्रिशूलीलगायत प्रहरी चौकीमा कार्यरत २६ जना प्रहरी र सशस्त्र प्रहरी तर्फका ९ जना र नेपाल सेनाकासहित  ४४ जना सम्पर्कविहीन रहेको उनले बताए । 

साथै रसुवागढी भन्सार, अध्यागमन कार्यलगायत केही कर्मचारीहरू समेत हालसम्म सम्पर्कमा नरहेको उनले बताए ।

मन्त्री खनालले प्रभावित क्षेत्रमा हालसम्म नौ जनाको शव फेला परेको र सनाखत हुन बाँकी अवस्था रहेको जानकारी दिए । 

उनका अनुसार उद्धार गरिएका घाइते नागरिकको उपचारको लागि नुवाकोटस्थित जिल्ला अस्पतालमा नेपाली सेनाका १५, नेपाल प्रहरीका १२ र सशस्त्र प्रहरी बलका १५ जना थप चिकित्सकसहितको स्वास्थ्य टोलि पठाइएको छ । 

मन्त्री खनालले रसुवा र नुवाकोट जिल्लाको जिल्ला विपद् व्यवस्थापन कोषमा एक करोड र धादिङ जिल्लाका लागि ५० लाख थप निकासा बताए  ।