काठमाडौं– बुधबार भोटेकोशीमा आएको भीषण बाढीका कारण विभिन्न ११ वटा जलविद्युत् आयोजनामा क्षति पुगेको छ । बाढीले ७ वटा निजी र ४ वटा सरकारी आयोजनामा क्षति पुर्‍याएको हो ।

क्षति पुगेकामध्ये ९ वटा आयोजना सञ्चालनमा आइसकेका थिए भने ४ वटा आयोजना निर्माणाधीन अवस्थामा रहेका थिए । बाढीले क्षति पुर्‍याएपछि अहिले ३५४ मेगावाट विद्युत् उत्पादन बन्द हुन पुगेको छ ।

बाढीले रसुवा जिल्लाका माथिल्लो त्रिशूली–१, रसुवागढी जलविद्युत् आयोजना, रसुवा–भोटेकोशी, माथिल्लो मेलुङ–ए, सान्जेन खोला, लाङटाङ खोला र चिलिमे जलविद्युत् आयोजनामा क्षति पुर्‍याएको छ ।

त्यस्तै, बाढीले नुवाकोट जिल्लाका त्रिशूली जलविद्युत् आयोजना, देवीघाट जलविद्युत, माथिल्लो त्रिशूली–३ ए, माथिल्लो त्रिशूली–३बी, मिडल त्रिशूली गंगा र सरकारी स्वामित्व सोलार आयोजनामा क्षति पुर्‍याएको छ । 

जलविद्युत् आयोजनामा पुगेको क्षतिका कारण लामो समयसम्म निर्माण र विद्युत् उत्पादन बन्द हुनसक्ने देखिएको छ ।