तेहरान- इरानले अमेरिकासँगै इजरायलको पक्षमा काम गरेको आरोप लागेका एक व्यक्तिलाई मृत्युदण्ड दिएको छ।

यसै वर्ष जनवरीमा भएको सरकारविरोधी प्रदर्शनका क्रममा चेनसा बोकेको आरोपमा पक्राउ परेका माजिद अदिनेहलाई मृत्युदण्ड दिइएको अन्तर्राष्ट्रिय समाचार संस्था एएफपीले जनाएको छ।

इरानी न्यायपालिकाका अनुसार अदिनेहलाई देशव्यापी रूपमा भएको प्रदर्शनमा ‘शत्रुतापूर्ण समूहको पक्षमा अपरेसनल गतिविधि’ गरेको अभियोगमा दोषी ठहर गरिएको थियो।

न्यायपालिकाको वेबसाइट मिजान अनलाइनका अनुसार उनीमाथि ‘जानाजानी आगजनी, देशको आन्तरिक सुरक्षाविरुद्ध अपराध गर्ने उद्देश्यले जमघट र षड्यन्त्र’ गरेको आरोप लगाइएको थियो।

‘मुद्दामा रहेका थुप्रै कागजात र प्रमाण तथा अभियुक्तको बयानका आधारमा कराज क्रान्तिकारी अदालतले उनलाई मृत्युदण्ड र सम्पूर्ण सम्पत्ति जफत गर्ने फैसला गरेको थियो,’ न्यायपालिकाले जनाएको छ।