काठमाडौं- विपक्षी खेलाडीलाई झापड हानेपछि मेजर लिग सकरमा इन्टर मियामीका कप्तान लियोनल मेसी जरिवानामा परेका छन् ।

बुधवार सम्पन्न खेलमा फिलाडेल्फिया युनियनविरुद्ध बराबरी खेल्ने क्रममा विपक्षी खेलाडीको टाउकोमा झापड हानेका थिए । सुबरु पार्कमा भएको खेल २-२ गोलको बराबरीमा सकिएको थियो ।

खेलको अन्त्यतिर युनियनका खेलाडी क्विन सुलिभानले बल पास गरेपछि आफूलाई कुहिना हानेको गुनासो गर्दै मेस्सीले सुल्लिभानको टाउको पछाडि हिर्काएका थिए । त्यसपछि सुलिभान आक्रोशित बनेका थिए ।

रेफ्रीले तत्कालै हस्तक्षेप गरेपछि अप्रिय घटना हुन पाएन । मेजर लिग सकरले मेस्सीलाई जरिवाना गरिएको पुष्टि गरे पनि जरिवानाको रकम भने सार्वजनिक गरेको छैन ।

यस खेलमा सुलिभानसँग विवाद गर्ने मेस्सी मात्र एक्लो खेलाडी थिएनन् । मियामीका इयान फ्रेलाई पनि लिगले जरिवाना गरेको छ। पेनाल्टी क्षेत्रमा लड्दा एक अर्कासँग अल्झिएका बेला फ्रेले सुलिभानको घाँटी समाएका थिए ।

तनावपूर्ण बनेको उक्त खेलमा इन्टर मियामीका यानिक ब्राइट र सुलिभानका भाइ क्याभानले अतिरिक्त समयमा रातो कार्ड पाएका थिए । तर, खेलको समीक्षापछि क्याभानमाथि लगाइएको एक खेलको प्रतिबन्ध भने फुकुवा गरिएको छ ।

यस खेलमा मेस्सीले मियामीका लागि दोस्रो गोल गरेका थिए । आफ्ना पिताको निधन भएपछि उनले गरेको यो पहिलो गोल हो ।