काठमाडौँ – स्टार फुटबलर लियोनेल मेसीले आफ्ना पिताको निधनपछिको पहिलो गोल गर्दै त्यसलाई बुवाप्रति समर्पित गरेका छन्। मेसीको उत्कृष्ट प्रदर्शनका बाबजुद इन्टर मियामीले मेजर लिग सकर (एमएलएस) अन्तर्गत फिलाडेल्फिया विरुद्धको खेलमा २-२ को बराबरीमा चित्त बुझाएको छ।

गोल गरेलगत्तै मेसीले भावुक हुँदै आकासतर्फ हात उठाएर गोल आफ्ना स्वर्गीय पितालाई समर्पित गरेका थिए। यसअघि उनले नै टोलीको पहिलो गोलका लागि उत्कृष्ट पास मिलाइदिएका थिए।

मेसीको गोलसँगै उनको खेल जीवनको समग्र गोल सङ्ख्यामा अर्को एउटा कोशेढुङ्गा थपिएको छ। फिलाडेल्फियाको घरेलु मैदानमा भएको खेलमा रोमाञ्चक प्रतिस्पर्धा भए पनि दुवै टोली अंक बाँड्न बाध्य भए।

खेलको ११ औँ मिनेटमा इन्डियाना भासिलेभको गोलबाट फिलाडेल्फियाले अग्रता लिएको थियो। तर, २१ औँ मिनेटमा मेसीको पासमा ड्यानियल पिन्टरले गोल गर्दै खेल बराबरीमा ल्याए। त्यसको पाँच मिनेटपछि अर्थात् २६ औँ मिनेटमा मेस्सी आफैँले गोल गर्दै मायमीलाई २–१ को अग्रता दिलाए। गोल गरेपछि मेसीले आकासतर्फ हात उठाउँदै पिताप्रति समर्पित गरेका थिए।

दोस्रो हाफको ५८ औँ मिनेटमा नेथन पियरेले गोल गर्दै फिलाडेल्फियालाई २–२ को बराबरीमा पुर्‍याए। अत्यन्तै तनावपूर्ण बनेको खेलको इन्जुरी समयमा दुवै टोलीका एक–एक जना खेलाडीले रातो कार्ड पाएका थिए। मायमीका यानिक ब्राइटले ९० पछि थपिएको १३ औँ मिनेटमा र फिलाडेल्फियाका काभान सुलिभानले ९० मिनेटपछि १४ औँ मिनेटमा रातो कार्ड खाँदै मैदान छाड्न परेको थियो।