काठमाडौं- राष्ट्रिय स्वतन्त्र पार्टी (रास्वपा)का सभापति रवि लामिछानेले बुधबार मन्त्री र सांसदहरूसहित संसदीय दलको बैठक राखेर कडा निर्देशन दिएका छन्।

दलका नेता वालेन्द्र शाह अनुपस्थित रहेको उक्त बैठकमा रविले सांसद र मन्त्रीहरूलाई अमर्यादित गतिविधि गरेर रमिता देखाउने काम बन्द गर्न भनेका छन् ।

उनले रास्वपाका सांसदहरूले आफ्ना गतिविधि पारदर्शी बनाउनुपर्ने पनि सुझाव दिएका छन्। ‘कतिपय सांसदहरूले प्रतिनिधिसभामा बोल्दा संसदीय दललाई नै जानकारी नगराएको भेटिएको छ । मन्त्रीहरुले समेत सदन र बाहिरका गतिविधिबारे पार्टीलाई जानकारी गराउने गरेका छैनन्’, उनले भने, ‘सांसद र मन्त्री दुवैले यस्ता किसिमिका गतिविधि सच्याउनुपर्छ।’

उनले मन्त्री र सांसदहरूलाई घमण्ड त्यागेर आपसी सहकार्य र संवादमार्फत् आफ्ना गतिविधि गर्न निर्देशन दिए।

‘तपाईंहरू सबैका गतिविधि मैले नजिकबाट नियालिरहेको छु। सबैले सँच्चिनुपर्छ र सुध्रनुपर्छ। म पनि त्यसतर्फ ध्यान दिन्छु। कतिपय सांसद र मन्त्रीहरूको व्यवहार अस्वभाविक देखिएको छ’, उनले भने, ‘त्यसलाई हामीले परिवर्तन गर्नुपर्छ, संसदीय भूमिकामा मर्यादित र जिम्मेवार बन्नुपर्छ । तपाईंहरूका गतिविधि थाहा पाउन हामीले एउटा मोबाइल एप्स सार्वजनिक गरेका छौँ। कृपया त्यसमा आफ्ना गतिविधि र कामको विवरण राखिदिनुहोला ।’

रविले त्यसक्रममा ‘आरएसपी पल्स’ एप्समा मन्त्रीहरूले पनि आफ्ना गतिविधि अपडेट गराउन निर्देशन दिए । त्यसमा संसद्मा बोल्ने विषय, भ्रमण र भेटघाटलगायत गतिविधि अपडेट गर्न उनले कडा निर्देशन दिए ।

रविले पोशाक शैलीको पनि ख्याल गर्न भने । संसद्मा प्रधानमन्त्री वालेन्द्र शाह नै टीसर्टमा आउने गरेका छन्। उनले सबैजना मर्यादामा रहनुपर्ने जानकारी गराउँदै सांसद र मन्त्रीहरू कसैलले रमिता नदेखाउन निर्देशनसमेत दिए।

सांसदहरूले मन्त्रीहरूलाई उनीहरूसँगै आफ्ना कुरा स्पष्ट राख्न उल्लेख गर्दै उनले एकअर्काको समन्वयमै सरकार सफल हुने पनि बताए । उनले यी सुझावलाई मन्त्री र सांसदहरूले त्यहीअनुसार ग्रहण गर्न आग्रह गरे ।