कर्णाली– कर्णाली प्रदेशसभाको बैठक आज बस्दैछ । बैठकमा सरकारका मुख्यमन्त्री मङ्गलबहादुर शाहीले विश्वासको मत लिने सम्भावित कार्यसूची रहेको छ ।

मुख्यमन्त्री शाहीले गत सोमबार सदनमा यससम्बन्धी पत्र दर्ता गराइसकेका छन् । नेकपा एमालेको समर्थनमा शाही गत साउन १२ गते मुख्यमन्त्री पदमा नियुक्त भएका थिए ।

दुई दलबीचको मन्त्रालय बाँडफाँडमा केही ढिलाइ भएका कारण मन्त्रिपरिषद् विस्तार हुन सकेको छैन । सदनबाट विश्वासको मत लिएपश्चात् मन्त्रिपरिषद् विस्तार गरिने मुख्यमन्त्री शाहीले बताएका छन् ।

कुल ४० सदस्यीय प्रदेशसभामा बहुमतका लागि २१ मत आवश्यक पर्दछ । जसमा नेपाली कम्युनिष्ट पार्टी (नेकपा) १४ र एमालेका १० प्रदेशसभा सदस्य रहेका छन् । यस्तै, नेपाली कांग्रेसका १५ र राप्रपाका १ जना सदस्य छन् ।