काठमाडौं- प्रतिनिधि सभाको मंगलबार बसेको बैठकमा एउटा विचित्र दृश्य देखियो। राष्ट्रिय स्वतन्त्र पार्टी (रास्वपा)की सांसद आशिका तामाङले परराष्ट्रमन्त्री शिशिर खनालको जवाफप्रति असन्तुष्टि जनाउँदै बैठक नै बहिष्कार गरेर हिँडेकी हुन्।

कम्बोडियामा निधन भएका धादिङका सन्तोष राईको शव ल्याउने विषयमा मंगलबार परराष्ट्रमन्त्री खनालले दिएको जवाफ चित्तबुझ्दो नभएको उनले गुनासो गरिन्।

त्यसपछि उनले थप प्रश्न सोध्न सभामुख डोलप्रसाद अर्यालले समय नदिएको भन्दै उनी संसद् बैठक फन्किएर बाहिरिएकी हुन् ।

पराष्ट्रमन्त्री खनालले जवाफ दिँदा-दिँदै सांसद तामाङले उठेर प्रश्न सोध्न पाउनुपर्ने जिकिर गरेकी थिइन् । तर, सभामुख अर्यालले बोल्न समय दिएनन् । त्यसपछि उनी झोंक्किएर हिँडेकी हुन्।

आशिकाले समय मागेपछि सभामुख अर्यालले दिन इन्कार गरेका थिए । ‘मैले बोल्न समय दिएको छैन, बस्नुस्’, सभामुख अर्यालले भने ।

तर आशिकाले आफूले बोल्न पाउनुपर्ने अडान राखि रहिन् । त्यति गर्दा पनि उनी रोकिइनन्। उनलाई सभामुख अर्यालले सांसद तामाङलाई बैठकको मर्यादा ख्याल गरेर बस्न निर्देशन दिए ।

तर सभामुख अर्यालको निर्देशनपछि उनी झन् आक्रोशित भइन् । त्यसपछि उनी झोंक्किँदै झोला बोकेर संसद् बैठकबाट बाटो लागिन् ।