काठमाडौँ– संघीय संसद अन्तर्गत रहेको विभिन्न पाँचवटा समितिको बैठक बस्दैछ । आज कृषि तथा प्राकृतिक स्रोत समिति, पूर्वाधार विकास समिति, विधायन व्यवस्थापन समिति, सार्वजनिक नीति तथा प्रत्यायोजित विधायन समिति र संघीय सबलीकरण तथा राष्ट्रिय सरोकार समितिको बैठक बस्न लागेको हो ।

कृषि तथा प्राकृतिक स्रोत समितिको बैठक बिहान साढे ९ बजे सिंहदरबारमा बस्नेछ । बैठकमा कृषि, वन तथा पर्यावरण मन्त्रालयद्वारा गठित मानव–वन्यजन्तु द्वन्द्व व्यवस्थापन प्राविधिक कार्यदलद्वारा तयार पारिएको प्रतिवेदनमाथि छलफल गर्ने कार्यसूची रहेको छ ।

बैठकमा कृषि, वन तथा पर्यावरणमन्त्री, मन्त्रालयका सचिव र मानव–वन्यजन्तु द्वन्द्व व्यवस्थापन प्राविधिक कार्यदल, राष्ट्रिय प्रकृति संरक्षण कोषका संयोजकलाई आमन्त्रण गरिएको छ ।

पूर्वाधार विकास समितिको बैठक बिहान १० बजे बस्नेछ । बैठकमा स्वतन्त्र ऊर्जा उत्पादकहरुको संस्था (इप्पान) र यसले भोग्नुपरेका समस्याहरुका विषयमा छलफल हुनेछ ।

विधायन व्यवस्थापन समितिको बैठक बिहान साढे ११ बजे सिंहदरबारमा बस्नेछ ।

सार्वजनिक नीति तथा प्रत्यायोजित विधायन समिति बैठक बिहान साढे १० बजे बस्नेछ । बैठकमा मदन पुरस्कार गुठीको स्थलगत अवलोकन गर्ने कार्यसूची छ ।

संघीयता सबलीकरण तथा राष्ट्रि सरोकार समितिको बैठक बिहान ११ बजे बस्नेछ । बैठकमा सरकारद्वारा नियुक्त हुने निकायका पदाधिकारीमा समावेशी तथा समानुपातिक प्रतितिधित्व सुनिश्चित गर्ने सम्बन्धमा छलफल गर्ने कार्यक्रम छ ।