काठमाडौं । तीन युवाको संयुक्त पहलमा ‘गन्तव्य कुरिएर सर्भिस प्रा.लि’ सञ्चालनमा आएको छ। काठमाडौंको सामाखुसी–टाउनप्लानिङमा कार्यालय स्थापना गरी कम्पनीले राष्ट्रिय तथा अन्तर्राष्ट्रिय कुरिएर तथा कार्गो सेवा सुरु गरेको हो ।

पत्रकारिता क्षेत्रमा कार्यरत गोपाल चन्द, सूचना प्रविधिका तिलक केसी र स्नातकोत्तर अध्ययनरत रामकुमार डंगीले संयुक्त रूपमा कम्पनी स्थापना गरेका हुन्।

कम्पनीको उद्घाटन अन्तर्राष्ट्रिय रोल्पाली सेवा समाजका अध्यक्ष तथा समाजसेवी डिलाराम वलीले गरेका हुन्। उद्घाटन कार्यक्रममा वलीले कुरिएर सेवा सामान ओसारपसारमा मात्र सीमित नभई समय, सुरक्षा र विश्वाससँग जोडिएको व्यवसाय भएकाले सेवाग्राहीको विश्वास जित्नुपर्ने बताए।

कम्पनीका अध्यक्ष गोपाल चन्दले विदेश जानेभन्दा नेपालमै सम्भावना खोजेर व्यवसाय सुरु गरिएको बताए। प्रविधिको प्रयोगमार्फत सेवाग्राहीलाई सहज सेवा दिने र घरदैलोमै पुगेर कुरिएर सेवा उपलब्ध गराउने कम्पनीको लक्ष्य रहेको सञ्चालक तिलक केसीले बताए।

गन्तव्य कुरिएरले नेपालका विभिन्न स्थानमा कागजात, पार्सल तथा व्यावसायिक सामग्री पुर्‍याउनुका साथै अन्तर्राष्ट्रिय कुरिएर तथा कार्गो सेवा सञ्चालन गर्ने जनाएको छ। आगामी दिनमा सेवा सञ्जाल विस्तार गर्दै रोजगारी सिर्जना गर्ने कम्पनीको योजना छ।