काठमाडौं – अभिनेता विपिन कार्कीको शीर्ष भूमिका रहने फिल्म ‘सेल्फी किङ’ माघमा रिलिज हुने भएको छ । यस वर्ष चर्चामा रहेका फिल्ममध्ये यो फिल्म पनि एक हो ।

निर्माण टिमले माघ २४ लाई प्रदर्शन मिति तोक्दै विपिनको चरित्र झल्किने एक पोस्टर समेत सार्वजनिक गरेको छ । फिल्ममा विशाल सापकोटाको निर्देशन रहनेछ । यही फिल्ममार्फत विशालले निर्देशनमा डेब्यु गरेका छन् ।

कमेडी ड्रामा भनिएको यो फिल्ममा विपिनले एक हास्यकलाकारको भूमिका निभाएका छन् ।

यस्तै फिल्ममा विपिनसँगै लक्ष्मी बर्देवा, भुवन चन्द, लोकमणि सापकोटा, अभय बराल, कमल देवकोटा लगायतका कलाकारको अभिनय देख्न सकिनेछ ।

गत वर्ष ‘प्रसाद’ निर्माण गरेका सुभाष थापा र निर्देशन गरेका दिनेश राउतले संयुक्त लगानीमा यो फिल्म निर्माण गरेका हुन् ।