काठमाडौं- पाकिस्तानको बलुचिस्तान प्रान्तस्थित खुज्दारको सिभिल कोलनीमा रहेको एक आवासीय क्षेत्रबाट सुरक्षाकर्मीले १७ वर्षीया बालिकासहित दुई जनालाई नियन्त्रणमा लिएका छन् । परिवारका स्रोतले दिएको जानकारी अनुसार अब्दुल कुदुस जरकजाई र उनकी १७ वर्षीया छोरी अक्सालाई अज्ञात स्थानमा लगिएको छ ।

परिवारका अनुसार गत अगस्ट ५ तारिखको राति करिब १० बजे काउन्टर टेरोरिज्म डिपार्टमेन्ट (सीटीडी) का कर्मचारी र सादा पोसाकका अधिकारीहरूले संयुक्त रूपमा उक्त आवासीय परिसरमा छापा मारेका थिए। छापा मार्ने क्रममा सुरक्षाकर्मीहरूले घरभित्र प्रवेश गरी महिला तथा अन्य बासिन्दाहरूलाई दुव्र्यवहार, भौतिक आक्रमण तथा घरको खानतलासी गरेका थिए।

त्यस दौरान अब्दुल कुदुस जरकजाई र उनकी छोरी अक्सालाई जबर्जस्ती नियन्त्रणमा लिइएको परिवारले बताएको छ। पक्राउ गर्नुको कुनै पनि कारण नबताइएको र उनीहरूविरुद्ध कुनै कानुनी कारबाही वा मुद्दा चलाइएको बारे पनि परिवारलाई जानकारी गराइएको छैन। उनीहरूलाई बेपत्ता पारिएदेखि हालसम्म कुनै पनि किसिमको जानकारी प्राप्त नभएको र उनीहरूलाई कहाँ राखिएको छ भन्नेबारे पनि परिवारलाई केही बताइएको छैन।

यस घटनाबाट पीडित परिवारले मानवअधिकार संगठनहरू, कानुन व्यवसायी समुदाय, राजनीतिक दलहरू र नागरिक समाजलाई घटनाको गम्भीरता बुझ्न तथा अब्दुल कुदुस र उनकी छोरीको सुरक्षित रिहाइ र खोजीका लागि पहल गर्न जोडदार अपिल गरेका छन्। यस विषयमा समाचार तयार पार्दासम्म पाकिस्तानी अधिकारीहरूले भने कुनै पनि आधिकारिक धारणा सार्वजनिक गरेका छैनन्।