काठमाडौं- ताइवानको पूर्वमा पर्ने समुद्री क्षेत्रमा चीनले आफ्ना तटरक्षक जहाजहरू तैनाथ गरेपछि अमेरिकाले गहिरो चिन्ता व्यक्त गरेको छ। अमेरिकी विदेश मन्त्रालयले चीनको यो कदमलाई क्षेत्रको स्थिरता बिगार्ने प्रकृतिको रूपमा वर्णन गर्दै बेइजिङलाई ताइवानमाथिको दबाबको अभियान रोक्न आग्रह गरेको छ ।

चिनियाँ तटरक्षक बलले शुक्रबार ‘शिउसान’ नामक जहाजको नेतृत्वमा ताइवानको पूर्वमा गस्ती बढाइएको जनाएको छ । चिनियाँ पक्षले ताइवान जलडमरूमध्यका दुवै तर्फका माछा मार्नेहरूको वैध अधिकार, हित, जीवन र सम्पत्तिको सुरक्षा गर्न यो कदम चालिएको दाबी गरेको छ । गत जुलाईदेखि नै यस क्षेत्रमा चिनियाँ गतिविधिहरू बढेका छन् ।

अमेरिकी विदेश मन्त्रालयका प्रवक्ताले ताइवानले शान्तिपूर्ण रूपमा प्रशासन चलाउँदै आएको समुद्री क्षेत्रमा चीनले आफ्नो अधिकार जमाउन खोज्नुले तनाव बढाउने र शान्तिपूर्ण समाधानका प्रयासहरूलाई कमजोर बनाउने बताएका छन्। उनले बेइजिङलाई ताइवानमाथिको दबाब अन्त्य गरी ताइवानका लोकतान्त्रिक रूपमा निर्वाचित अधिकारीहरूसँग अर्थपूर्ण संवाद गर्न आग्रह गरेका छन्।

यसैबीच अमेरिकी विदेशमन्त्री मार्को रुबियोले पनि ताइवानको यथास्थितिमा कुनै पनि परिवर्तनको समर्थन नगरिने र यसलाई बदल्ने कुनै पनि बलपूर्वक प्रयासको विरोध गर्ने स्पष्ट पारेका छन्। अमेरिका र चीनबीचको कुनै पनि किसिमको द्वन्द्व दुवै देश र सम्पूर्ण विश्वका लागि विनाशकारी हुने उल्लेख गर्दै उनले सम्बन्ध कायम राख्दै द्वन्द्वको जोखिम कम गर्न संवादको आवश्यकता औँल्याएका छन्। ताइवान पक्षले पनि आफ्ना जहाजमार्फत चिनियाँ गतिविधिलाई नजिकबाट निगरानी गरिरहेको जनाएको छ।