वीरगन्ज – प्रहरीले अवैध रूपमा औषधिजन्य वस्तु उत्पादन गर्ने कार्यमा संलग्न एक जनालाई पक्राउ गरेको छ ।

वीरगन्ज महानगरपालिका–११ श्रीपुरस्थित आरपी फार्मास्युटिकल्स प्रालिमा अवैध रूपमा औषधिजन्य वस्तु उत्पादन तथा स्टिकर लेबलिङ भइरहेको अवस्थामा फर्म सञ्चालक राहुलकुमार चौहानलाई आज नियन्त्रणमा लिइएको पर्सा जिल्ला प्रहरी कार्यालयका प्रहरी नायब उपरीक्षक तथा प्रवक्ता चक्रबहादुर मल्लले जानकारी दिए ।

जिल्ला प्रहरी कार्यालयबाट प्रहरी नायब उपरीक्षक (डिएसपी) राजु कार्की र वडा प्रहरी कार्यालय श्रीपुरबाट प्रहरी निरीक्षक नवीन थापामगरको संयुक्त टोलीले फर्ममा जाँच तथा खानतलासी क्रममा सञ्चालक चौहानलाई नियन्त्रणमा लिएको उनको भनाइ छ ।

उनले भने, “फर्ममा जाँच तथा खानतलासी क्रममा अनुमतिबिना औषधिजन्य वस्तु उत्पादन तथा स्टिकर लेबलिङ भइरहेको पाइएको छ, त्यस क्रममा भेटिएका औषधिजन्य सामग्री तथा अन्य आवश्यक प्रमाणसमेत नियन्त्रणमा लिइएको छ, आवश्यक अनुसन्धान तथा कानुनी कारबाहीका लागि वडा प्रहरी कार्यालय श्रीपुरमा राखिएको छ ।”