कास्की – कास्की र पर्वतको सीमाना भएर बग्ने मोदीखोलामा बिहीबार मध्यराति आएको भीषण बाढीले दुई वटा मेटल पुल बगाएको छ। बाढीका कारण अन्नपूर्ण माता मन्दिर परिसरमा थपिएका सन्त–पुजारीसहित तीन जना फसेका छन्।

अन्नपूर्ण गाउँपालिका–५ र ६ को सीमास्थित बिरेठाँटी नजिक मोदीखोलाको बिच भागमा रहेको अन्नपूर्ण माता मन्दिर जाने-आउने दुवैतर्फ (कास्की र पर्वत जोड्ने) का मेटल पुल राति बाढीले बगाएको हो। बाढीले मन्दिरको तल्लो आधा भागमा समेत क्षति पुर्‍याएको छ।

बाढीका कारण मन्दिर परिसरमै एक जना पुजारी र दुई जना भक्तजन थुनिएका छन्। उनीहरूको उद्धारका लागि सशस्त्र प्रहरी बल नेपाल नं. २४ कालिका गण कास्कीबाट विशेष टोली खटिएको छ।

सशस्त्र प्रहरीका अनुसार चार जना रोप-रेस्क्यु गर्ने र तीन जना गोताखोरसहितको तालिमप्राप्त टोली आवश्यक विपद् उद्धार सामग्रीसहित राति नै घटनास्थल पुगिसकेको छ।

सशस्त्र प्रहरी बलका डीएसपी शैलेन्द्र थापाका अनुसार फसेका मानिसलाई सुरक्षित बाहिर निकाल्न उज्यालो भएपछि उद्धार टोलीले निरन्तर प्रयास गरिरहेको छ।