काठमाडौं-  शिवरात्रीका दिन काठमाडौंको पशुपतिनाथ मन्दिरमा पूजा अर्चना गर्ने दर्शनार्थीको घुइँचो लाग्यो । शिवभक्तहरु बिहान ३ बजेदेखि नै पशुपतिनाथको दर्शनका लागि लाइनमा लागे । लाइनमा लाग्नेहरु आफ्नो मनोकांक्षा पूराहोस् भन्ने हेतुले पशुपतिनाथ मन्दिरको पूर्जाअर्चनामा सरिक भएका थिए । दिनभरको गर्मी त्यसमाथिको निराहार ब्रतले कतिपयको स्वास्थ्यमा समेत समस्या देखिएको थियो । यस्तो स्वास्थ्यमा समस्या देखिनेहरु प्रायः वृद्धवृद्धा बढी थिए । त्यस्ता श्रद्धालु भक्तजनको सेवाभावका लागि विभिन्न शिविरहरु पनि खडा थिए ।

‘सेवा हि परमोधर्म’ (सेवा नै सवैभन्दा ठूलो धर्म) हो भन्ने उद्देश्यका साथ उनीहरुले आफ्नो कर्मलाई दत्तचित्तसाथ निभाएका थिए । लाइनमा लागेकाहरुमध्ये कसैलाई कुनै प्रकारको स्वास्थ्यमा समस्या देखिए हतार हतार शिविरमा लैजान्थे ।

पशुपतिको लाइनमा बस्नेहरु कोही सेल्फीमा रमाएका थिए त कोही नाचगाँन र शिवभक्तिमा । युवायुवतीको जमात सेल्फीमा रमाइरहँदा वृद्धवृद्धाहरु भने गलित, थकित र मलिन मुद्रामा देखिन्थे । उनीहरुलाई पशुपतिनाथको त्यो भीडले सास्ती बनाएको थियो ।

नेपाली सेना तथा पशुपति क्षेत्र विकास कोषद्वारा सञ्चालित मुख्य स्वास्थ्य शिविर, नेपाल रेडक्रस सोसाइटीद्वारा सञ्चालित शिविर तथा विभिन्न संघसंस्थाबाट सञ्चालित निःशुल्क स्वास्थ्य शिविरहरु आइतबार साँझबाट नै सञ्चालनमा ल्याइएका थिए ।

शिविरमा सामान्य ओपीडी तथा इमरजेन्सी उपचारको समेत सुविधा दिइएको थियो । ओपीडिमा धेरैजसो उच्च रक्तचाप भएका विरामीहरु आउने गरेको एक स्वयमसेविकाले बताइन् । टाउको दुख्ने, रिगँटा लाग्ने, वाकवाक लाग्ने जस्ता समस्या भएका बिरामीहरुले समेत स्वास्थ्य परीक्षण गराएको थिए ।

खोजतलास केन्द्र

मन्दिर आउने भक्तजनहरुलाई लक्षित गर्दै कोषले खोजतलास केन्द्र पनि सञ्चालन गरेको थियो । महाशिवरात्रीका दिन पाशुपत क्षेत्रमा ठूलो संख्यामा मानिसहरु आउने र भीडभाडमा कोही अलपत्र पर्ने हुँदा यो व्यवस्था गरिएको थियो ।

मन्दिरको दर्शनका लागि पुगेका बालबालिका वृद्धवृद्धा हराउने समस्या बढी थियो । यसरी हराएमा अथवा केही सामान हराएमा सिधै खोजतालास केन्द्र तथा सुरक्षाकर्मीहरुलाई खबर दिनुपर्ने व्यवस्था थियो । खोजतलास केन्द्रले हराएकाहरुलाई खोज्ने र भेटिएकाहरुलाई जिम्मा लगाउने काम गरिरहेको थियो ।