काठमाडौं– निर्वाचन प्रहरीको पोसाक खरिदमा अनियमितताको उजुरीबारे संसद्को सार्वजनिक लेखा समितिमा जवाफ दिने क्रममा प्रहरी महानिरीक्षक दानबहादुर कार्कीले असन्तुष्टि जनाएका छन् ।

उजुरीबारे स्पष्टीकरण दिन आउनु स्वाभाविक भए पनि छलफलका क्रममा आफूहरूको ‘हुर्मत लिने’ किसिमको परिस्थिति सिर्जना भएको उनको भनाइ थियो ।

समितिमा कार्कीले आफूलाई ‘यो धर्तीमा सबैभन्दा काम नलाग्ने मानिस हामी नै रहेछौँ कि’ भन्ने महसुस भएको टिप्पणी गरे । संसदीय समितिमा भएको छलफलको शैलीप्रति असन्तुष्टि जनाउँदै उनले यस्तो अवस्था सभ्य र संसदीय दृष्टिले समेत सहज नलागेको बताए ।

यसैबीच, राष्ट्रिय स्वतन्त्र पार्टीका सांसद खगेन्द्र सुनारले निर्वाचन प्रहरीको पोसाक खरिद प्रकरणबारे छानबिन समिति गठन गर्नुपर्ने माग गरेका छन् ।

पोशाक खरिदमा अनियमितता भएको उजुरी परेपछि सार्वजनिक लेखा समितिले सम्बन्धित अधिकारीसँग यसबारे स्पष्टीकरण लिएको हो।