नयाँदिल्ली– भारतमा भएका दुई छुट्टाछुट्टै सडक दुर्घटनामा परी कम्तीमा १५ जनाको मृत्यु भएको छ भने अन्य केही घाइते भएका छन्।

दक्षिणी राज्य तेलङ्गानामा मालवाहक गाडीले तीनपाङ्ग्रे सवारीसाधनलाई ठक्कर दिँदा पाँच महिलासहित छ जनाको मृत्यु भएको स्थानीय अधिकारीहरूले बताएका छन्। दुर्घटनामा अन्य छ जना घाइते भएका छन्। घाइतेहरूको स्थानीय अस्पतालमा उपचार भइरहेको जनाइएको छ।

यसैबीच, मध्य प्रदेशमा भारी वर्षाका कारण नाला भरिएपछि यात्रुवाहक गाडी बगाउँदा एउटै परिवारका छ जनासहित नौ जनाको मृत्यु भएको छ। स्थानीय अधिकारीका अनुसार गाडीमा ११ जना सवार थिए। तीमध्ये दुई जना पौडी खेलेर सुरक्षित स्थानमा पुग्न सफल भएका छन्।

दुवै दुर्घटनाबारे स्थानीय प्रशासनले थप अनुसन्धान गरिरहेको जनाइएको छ।