काठमाडौं- राष्ट्रिय मानवअधिकार आयोगले काठमाडौँको माइतीघरमा अनशनरत विनय यादवको बिग्रँदो स्वास्थ्य अवस्थाप्रति गम्भीर बन्न सरकारलाई आग्रह गरेको छ ।

सुनसरीको देवानगञ्जमा भएको घटनाको निष्पक्ष छानबिनको माग गर्दै यादव १२ दिनदेखि अनशनमा बसिरहेका छन् । आयोगले यादवको स्वास्थ्य अवस्थाबारे जानकारी लिएपछि उनको जीवनरक्षाका लागि तत्काल प्रभावकारी स्वास्थ्य उपचारको व्यवस्था गर्न सरकारसँग आग्रह गरेको हो ।

आयोगका प्रवक्ता डा. टीकाराम पोखरेलले जारी गरेको विज्ञप्तिमा अनशनरत यादवको स्वास्थ्य अवस्थाप्रति संवेदनशील भई प्रभावकारी स्वास्थ्य उपचारका लागि पहल गर्न र उनको जीवनरक्षा गर्न सरकारलाई आग्रह गरिएको छ ।

आयोगले यादवले उठाएका विषयलाई वार्ताका माध्यमबाट समाधान गर्नसमेत सरकारलाई अनुरोध गरेको छ । अनशनका कारण स्वास्थ्य अवस्था थप जटिल बन्न सक्ने भएकाले समयमै आवश्यक उपचार तथा संवादमार्फत समस्या समाधान गर्न आयोगले जोड दिएको छ ।