बारा – बाराको फेटा गाउँपालिकामा करेन्ट लागेर १८ वर्षीय युवकको मृत्यु भएको छ । मृत्यु हुनेमा फेटा गाउँपालिका–७ कुकुरभुक्काका लक्ष्मी साह तेलीका छोरा गणेश साह तेली रहेका छन् ।

जिल्ला प्रहरी कार्यालय बाराका अनुसार सोमबार दिउँसो करिब १२ बजे स्थानीय रुप नारायण साह कानुको घरमा शिवगुरुको पूजा आयोजना गरिएको थियो। पूजाका लागि भजन बजाउने तयारी भइरहेका बेला गणेशलाई करेन्ट लागेको हो ।

स्थानीय महिलाहरूले सामूहिक रूपमा रकम संकलन गरी खरिद गरेको स्पिकरको एम्प्लिफायरको तार विद्युत् बोर्डमा जोड्ने क्रममा गणेशलाई अचानक करेन्ट लागेको प्रहरीले जनाएको छ ।

करेन्ट लागेर गम्भीर घाइते भएका गणेशलाई तत्काल उपचारका लागि प्रादेशिक अस्पताल कलैया लगिएको थियो। तर अस्पताल पुर्‍याएपछि दिउँसो १२ बजेर ३८ मिनेटमा गरिएको ईसीजी परीक्षणका क्रममा चिकित्सकले उनलाई मृत घोषणा गरेका थिए।

घटनापछि घटनाको थप अनुसन्धानका लागि इलाका प्रहरी कार्यालय छतवाबाट प्रहरी सहायक निरीक्षक कृष्णनन्दन ठाकुरको नेतृत्वमा प्रहरी टोली घटनास्थलमा पुगेको छ।

घटनाको कारण र अन्य विवरणबारे थप अनुसन्धान भइरहेको जिल्ला प्रहरी कार्यालय बाराले जनाएको छ।