काठमाडौं– दक्षिण भारतीय सुपरस्टार यश फेरि एकपटक दमदार र रहस्यमय अवतारमा देखिएका छन् । उनको बहुप्रतीक्षित फिल्म ‘टक्सिक’ को ट्रेलर सार्वजनिक भएसँगै फिल्मलाई लिएर दर्शकमाझ उत्साह थपिएको छ । 

बेंगलुरुमा आयोजित विशेष कार्यक्रममा सार्वजनिक गरिएको ट्रेलरमा यशलाई यसअघि देखिएको भन्दा निकै फरक र डार्क शैलीमा प्रस्तुत गरिएको छ।

गीतु मोहनदासको निर्देशनमा बनेको ‘टक्सिक’ ग्याङस्टर एक्सन थ्रिलर हो। पुरानो समयको परिवेशमा आधारित फिल्ममा अपराध, सत्ता र त्यसको अँध्यारो संसारमा फसेका पात्रहरूको कथा देखाइनेछ। ट्रेलर हेर्दा फिल्ममा एक्सनसँगै भावनात्मक संघर्ष र रहस्यलाई पनि प्रमुखता दिइएको बुझिन्छ।

फिल्मको सबैभन्दा ठूलो आकर्षण भने यशको दोहोरो भूमिका हो। यशले राया र रुमी नामका दुई फरक पात्रको भूमिका निभाएका छन्। भारतीय सञ्चारमाध्यमका अनुसार यी पात्रलाई बाबु र छोराको रूपमा प्रस्तुत गरिएको छ। ट्रेलरमा दुवै पात्रको लुक्स, स्वभाव र प्रस्तुतिलाई निकै फरक देखाइएको छ।

यशको चरित्र केवल शक्तिशाली ग्याङस्टरका रूपमा मात्र देखिँदैन। ट्रेलरमा उनको पीडा, आक्रोश, भावनात्मक संघर्ष र रहस्यमय पक्षलाई पनि बलियो रूपमा प्रस्तुत गरिएको छ। यही कारण ‘टक्सिक’ सामान्य एक्सन फिल्मभन्दा केही फरक हुने संकेत देखिन्छ।

ट्रेलरमा नयनतारा, कियारा आडवाणी, रुक्मिणी वसन्त, हुमा कुरैशी, तारा सुतारिया र अक्षय ओबेरोयलगायत कलाकारको पनि झलक देखाइएको छ। तर उनीहरूका पात्र र कथासँगको सम्बन्धबारे निर्माण पक्षले धेरै कुरा खुलाएको छैन । 

‘टक्सिक’ अगस्ट २६ अर्थात् भदौ १० गतेदेखि सिनेमा हलमा प्रदर्शनमा आउनेछ। फिल्मको कथा गीतु मोहनदास र यशले संयुक्त रूपमा लेखेका हुन् । 

ट्रेलरले फिल्मको मुख्य कथा वा सम्भावित ट्विस्टबारे धेरै संकेत नगरेकाले दर्शकमा यसको रहस्य झनै बढेको छ।