काठमाडौं– नेकपा नेता डा. भीम रावलले प्रधानमन्त्री वालेन्द्र (बालेन) शाह नेतृत्वको सरकारको कार्यशैलीप्रति कडा आलोचना गरेका छन्।

सामाजिक सञ्जालमार्फत् आफ्नो धारणा सार्वजनिक गर्दै रावलले सुकुम्वासी बस्तीमा डोजर चलाएपछि अब सेनाको ब्यारेकसम्म डोजर पुर्‍याइएको भन्दै प्रश्न उठाएका छन्।

उनले ठेकेदारका खुट्टा भाँच्ने चेतावनी दिने, विद्यालयका प्राध्यापकलाई हप्काउने, आफ्नै महाधिवेशनमा निम्ता गरिएका व्यक्तिलाई होच्याउने तथा तराई–मधेसमा भएको साम्प्रदायिक तनावका क्रममा आफ्नै पार्टीका व्यक्तिसँग सम्झौता गर्ने जस्ता गतिविधिपछि अहिले सेनाको ब्यारेकमा पुगेर सैनिकलाई हप्काउने शैली देखिएको आरोप लगाए।

रावलले सडक विस्तार जनताको आवश्यकता हुन सक्ने स्वीकार गर्दै त्यसका लागि संविधान, कानुन, विधि र पद्धतिअनुसार सम्बन्धित निकायले निर्णय गरी सेनालाई औपचारिक जानकारी र निर्देशन दिनुपर्ने बताए।

‘तर उल्टो व्यवहार भइरहेको छ। राज्य सञ्चालन कुन दिशातर्फ धकेलिँदैछ ?’ उनले भनेका छन् । उनले वर्तमान सरकारको कार्यशैलीप्रति गम्भीर प्रश्न उठाएका छन्।