काठमाडौं– पाकिस्तानस्थित ८,०४७ मिटर अग्लो ब्रोड पिक हिमाल आरोहणका क्रममा हिमपहिरोमा परेर ज्यान गुमाएका विश्व कीर्तिमानी नेपाली पर्वतारोही निर्मल पुर्जा (निम्स दाइ) सहित दिवंगत सम्पूर्ण आरोहीप्रति श्रद्धाञ्जली अर्पण गर्दै काठमाडौंको माइतीघर मण्डलामा दीप प्रज्वलन गरिएको छ।

पर्वतारोहण क्षेत्रसँग सम्बन्धित व्यक्तित्व, शुभेच्छुक तथा सर्वसाधारणको सहभागितामा आयोजित कार्यक्रममा दिवंगत आरोहीहरूको सम्झनामा मौनधारण गर्दै दीप प्रज्वलन गरिएको थियो। सहभागीहरूले उनीहरूको साहस, समर्पण र पर्वतारोहण क्षेत्रमा पुर्‍याएको योगदानको स्मरण गरेका थिए।

विश्वका १४ वटै ८ हजार मिटरभन्दा अग्ला हिमाल अत्यन्त छोटो समयमै आरोहण गरेर विश्व कीर्तिमान कायम गरेका निर्मल पुर्जाको निधनले नेपाली पर्वतारोहण क्षेत्रलाई अपूरणीय क्षति पुगेको सहभागीहरूले बताएका छन् । 

केही दिनअघि पाकिस्तानको ब्रोड पिक क्षेत्रमा आएको हिमपहिरोमा पुर्जा सहित अन्य आरोहीहरू बेपत्ता भएका थिए। खोज तथा उद्धार प्रयासपछि उनीहरूको निधन भएको पुष्टि भएपछि देशभर शोक व्यक्त गरिएको छ ।