काठमाडौँ – काठमाडौँको नागपोखरीस्थित एक घरबाट ३२९.०५ ग्राम लागू औषध खैरो हेरोइन, विभिन्न औषधीय लागू पदार्थ र नगदसहित चार जना पक्राउ परेका छन्।

विशेष सूचनाका आधारमा प्रहरी वृत्त मालिगाउँबाट खटिएको प्रहरी टोलीले साउन १८ गते नागपोखरीस्थित प्रभात तिवारीको घर तथा बा ७ च ५१८० नम्बरको गाडी जाँच गर्दा उनीहरूलाई नियन्त्रणमा लिएको हो।

पक्राउ पर्नेहरूमा घरधनी ४३ वर्षीय प्रभात तिवारी, ललितपुर-४ का ५१ वर्षीय सलिन श्रेष्ठ, काठमाडौँ-१४ बल्खुका ५१ वर्षीय भुपेन्द्र श्रेष्ठ र सर्लाही बरहथवा घर भई काठमाडौँ-१२ बस्दै आएका ४० वर्षीय सुजन रायमाझी रहेका छन्।

उनीहरूको साथबाट ३२९.०५ ग्राम खैरो हेरोइन, २२१ क्याप्सुल ट्रामाडोल, १०० ट्याब्लेट नाइट्राजेपाम र नगद १ लाख ९८ हजार ३ २५ रुपैयाँ बरामद गरिएको जिल्ला प्रहरी परिसर काठमाडौँका प्रवक्ता एवं प्रहरी उपरीक्षक दानबहादुर थापाले जानकारी दिए।

त्यस्तै, प्रहरीले उनीहरूको साथबाट ३ थान ल्यापटप, १ थान डिजिटल तराजु, १ थान सञ्चार सेट, १ थान एलमुनियम पेपर रोल र ४ थान मोबाइलसमेत जफत गरेको छ। पक्राउ परेकाहरूमाथि लागू औषधसम्बन्धी कसुरमा थप अनुसन्धान भइरहेको प्रहरीले जनाएको छ।