काठमाडौँ – भारतको बिहारस्थित बाँकीपुर विधानसभा सिटमा जन सुराज पार्टीका संस्थापक प्रशान्त किशोर विजयी भएका छन्। भारतीय जनता पार्टी (भाजपा) का अध्यक्ष नितिन नवीन राज्य सभामा छानिएपछि खाली भएको उक्त सिटमा जुलाई ३० मा उपनिर्वाचन भएको थियो।

भाजपाको ३० वर्ष पुरानो किल्ला भत्काउँदै किशोरले निकटतम प्रतिद्वन्द्वी भाजपाका नीरज कुमारलाई १९ हजार ३२४ मतान्तरले पराजित गरे। किशोरले ६४ हजार १५१ मत प्राप्त गर्दा कुमारले ४४ हजार ८२७ मत मात्र पाए। यस क्षेत्रमा सन् १९९५ देखि लगातार भाजपाले जित हासिल गर्दै आएको थियो।

जीतपछि प्रतिक्रिया दिँदै किशोरले ३० वर्षदेखि कायम रहेको भाजपाको किल्ला केवल ३० दिनको प्रयासमा ढलेको बताए। “यो निर्वाचन एक क्षेत्रको सांसद छान्नका लागि मात्र नभई प्रधानमन्त्री नरेन्द्र मोदी र गृहमन्त्री अमित शाहलाई स्पष्ट सन्देश दिनका लागि थियो,” उनले भने।

यसैबीच, उपनिर्वाचन भएका अन्य क्षेत्रमध्ये मध्यप्रदेशको डाटियामा कांग्रेसका घनश्याम सिंहले भाजपाका आशुतोष तिवारीलाई ६ हजार १६ मतान्तरले पराजित गरेका छन्। उता गुजरातको मञ्जपुरमा भने भाजपाका सतेन्द्रभाइ पटेलले कांग्रेसका भिखाभाई रबरीलाई ३० हजार मतान्तरले हराउँदै जित दर्ता गराएका छन्।