काठमाडौं- अमेरिका र भारतबीच बहुप्रतीक्षित द्विपक्षीय व्यापार सम्झौता आगामी तीनदेखि चार महिनाभित्र हस्ताक्षर हुन सक्ने एक उच्च अमेरिकी अधिकारीले बताएका छन् । फिलिपिन्सको मनिलामा भएको आसियान विदेशमन्त्रीहरूको बैठकको साइडलाइनमा नाम नछाप्ने सर्तमा रोयटर्ससँग कुरा गर्दै ती अमेरिकी अधिकारीले दुई देशबीचको अधिकांश वार्ता लगभग पूरा भइसकेको जानकारी दिएका छन्।

उनले सम्झौताका सबै विषयहरू तयार भइसकेको र सम्झौताको कागजात नै तयार रहेको बताएका छन्। दुई देशबीचको आर्थिक सम्बन्धलाई थप गहिरो बनाउन, बजार पहुँच विस्तार गर्न र व्यापारिक अवरोधहरू कम गर्न यो सम्झौताको तयारी गरिएको हो। दुवै देशका बीचमा द्विपक्षीय मुद्दाहरूमा सहमति जुटिसकेको भए पनि अमेरिकातर्फबाट जारी केही व्यापारिक अनुसन्धानहरू बाँकी रहेका कारण सम्झौतामा केही ढिलाइ भएको अधिकारीले स्पष्ट पारेका छन्।

अमेरिकी कानुनको ‘दफा ३०१’ अन्तर्गत अन्यायपूर्ण व्यापार अभ्यासहरूविरुद्ध भइरहेका अनुसन्धानहरू पूरा भएपछि मात्र सम्झौताले अन्तिम रूप पाउनेछ। ती अधिकारीका अनुसार ६० वटा देशहरूसँग सम्बन्धित यस्तै एउटा अनुसन्धान यो साता वा अर्को साताभित्र टुंगिने अपेक्षा गरिएको छ। ती अनुसन्धानहरू सम्पन्न भएपछि भारतलगायत अन्य देशहरूसँगको व्यापारिक प्रगति देखिनेछ।

यसैबीच, अमेरिकाले श्रम शोषणबाट उत्पादित वस्तुहरूको व्यापार नियन्त्रण गर्न असफल भएको आरोप लगाउँदै भारतलगायत दर्जनौं राष्ट्रहरूमाथि १२.५ प्रतिशतसम्मको नयाँ भन्सार शुल्क प्रस्ताव गरेको छ।