धनुषा– प्रहरीले धनुषाको सबैला नगरपालिका–१२ नहरचोकस्थित हनुमान मन्दिर परिसरमा एक व्यक्ति मृत भेटिएको विषयलाई धार्मिक विवादसँग नजोड्न आग्रह गरेको छ ।

जिल्ला प्रहरी कार्यालय धनुषाका प्रहरी नायव उपरीक्षक एवं प्रवक्ता तथा सूचना अधिकारी मधुसुधन न्यौपानेले एक प्रेस विज्ञप्ति जारी गर्दै मन्दिर परिसरमा मृत फेला परेका अन्दाजी ४० वर्षीय बन्ठु राउत कडेरी रहेको उल्लेख गर्दै उक्त घटना विशुद्ध आपराधिक व्यक्तिहरुबाट भएको देखिएकाले विवादको विषय नबनाउनु अग्रह गरेका छन् ।

उनले घटनास्थलमा तालिमप्राप्त कुकुरसहितको अनुसन्धान टोली खटि आवश्यक अनुसन्धान भइरहेकाले शान्ति कायम राख्नेतर्फ सहयोग पुर्‍याउन नागरिकमा अपिल गरेका छन् ।

कडेरी मन्दिरको पुजारी नभई घुमि हिँड्ने व्यक्ति रहेको र बाहिर कामकाज गरी मन्दिरमा सुत्न आउने व्यक्ति भएको प्रारम्भिक अनुसन्धानबाट खुलेको प्रहरीले जनाएको छ ।

मृतकको शव पोष्टमार्टमका लागि जनकपुरस्थित प्रादेशिक अस्पतालमा राखिएको छ ।