काठमाडौं – प्रधानमन्त्री बालेन शाह राष्ट्रका नाममा सम्बोधन सम्पन्न गरेलगत्तै बिहीबार राति राष्ट्रपति रामचन्द्र पौडेललाई भेट्न शीतल निवास पुगेका छन् ।

प्रधानमन्त्रीको राष्ट्र सम्बोधनपछि भएको यो भेटलाई पछिल्लो समय तराई–मधेसका विभिन्न जिल्लामा विकसित घटनाक्रमसँग जोडेर हेरिएको छ । स्रोतका अनुसार प्रधानमन्त्रीले राष्ट्रपतिलाई वर्तमान सुरक्षा अवस्था, सरकारले अघि सारेका कदम तथा समसामयिक राजनीतिक विषयबारे जानकारी गराएका छन् ।

तराई–मधेस क्षेत्रमा पछिल्ला दिनहरूमा देखिएको तनाव र त्यसलाई नियन्त्रण गर्न सरकारले चालेका पहलका विषयमा पनि भेटमा छलफल भएको बताइएको छ ।

पछिल्ला घटनापछि सरकारमाथि शान्ति–सुरक्षा कायम राख्न र परिस्थितिलाई प्रभावकारी रूपमा व्यवस्थापन गर्नुपर्ने दबाब बढिरहेका बेला प्रधानमन्त्रीको शीतल निवास भ्रमणलाई अर्थपूर्ण रूपमा हेरिएको छ। यद्यपि, भेटबारे औपचारिक विवरण भने सार्वजनिक गरिएको छैन ।