काठमाडौं – आईसीसी क्रिकेट विश्वकप लिग–२ अन्तर्गत नेदरल्यान्ड्समा जारी ओडीआई शृङ्खलामा नेपालले लगातार चौथो हार बेहोरेको छ । बुधबार भएको खेलमा नेपाल घरेलु टोली नेदरल्यान्ड्ससँग ५७ रनले पराजित भएको हो ।

नेदरल्यान्ड्सले दिएको २२६ रनको लक्ष्य पछ्याएको नेपाल ४८ ओभरमा १६८ रनमा अलआउट भयो । नेपालका लागि आसिफ शेखले सर्वाधिक ३८ रन बनाए भने कप्तान रोहित पौडेलले २६ र करण केसीले २३ रनको योगदान दिए ।

यसअघि टस हारेर पहिले ब्याटिङ गरेको नेदरल्यान्ड्सले ५० ओभरमा ९ विकेट गुमाउँदै २२५ रन बनाएको थियो। उसका लागि नोआ क्रोसले ७० तथा कप्तान स्कट एडवार्ड्सले ५७ रन बनाए। नेपालका करण केसीले ४ विकेट लिए।

यो हारसँगै नेपालको लिग–२ मा शीर्ष चारमा पुग्ने सम्भावना लगभग समाप्त भएको छ। ३२ खेलबाट २४ अंकमा रहेको नेपाल अब बाँकी सबै खेल जिते पनि अन्य टोलीको नतिजामा निर्भर रहनुपर्ने अवस्था बनेको छ।