काठमाडौं – एक्सन निर्देशकको छवि बनाएका सौरभ चौधरीले बिग बजेटमा फिल्म ‘साम्राज्य’ बनाउने घोषणा गरेका छन् ।

यो फिल्म लाइनअप र मेकिङ अहिलेसम्मकै बिग स्केलको हुने दाबी निर्माण पक्षले गरेको छ । तर, अहिलेसम्म कुनै पनि कलाकारको नाम सार्वजनिक गरिएको छैन ।

जबकि भदौ २० बाट छायाङ्कन सुरु गर्ने योजनामा निर्देशक सौरभ छन् ।

७० दिन लगाएर छायाङ्कन गरिने निर्देशक सौरभले बताए । छायाङ्कनमा बढी नै समय दिने योजनमा उनी रहेको देखिन्छ । किनकि, ३० दिनमा एक फिल्मको छायाङ्कन सक्ने अभ्यास छ ।

अधिकांश छायाङ्कन पूर्वी नेपालमा हुने बताइएको छ । थिम पोस्टरले यो फिल्म कुनै युद्धको कथामा बन्ने संकेत गर्छ । कथाबारे निर्माण पक्षले खुलाएको छैन ।

डार्क हर्स इन्टरटेन्मेन्टको प्रस्तुति रहने यस फिल्मको निर्माता प्रवेश चौधरी र निला देव हुन् ।