काठमाडौं । एसओएस बालग्रामका कर्मचारी सवार जीप ललितपुरमा दुर्घटना भएको छ । उक्त दुर्घटनामा परी चालकको मृत्यु भएको छ भने पाँचजना घाइते भएका छन् ।

ललितपुरको महाँकाल गाउँपालिकामा उक्त स्कार्पियो दुर्घटना भएको प्रहरीले जानकारी दिएको छ । महाँकाल गाउँपालिका–३ गोटीखेलबाट चापागाउँतर्फ आउँदै गरेको बीएए ४६३९ नम्बरको स्कार्पियो महाँकाल गाउँपालिका–२ कटनभञ्ज्याङस्थित सडकबाट करिब ५० मिटर तल खसेको प्रहरीले जनाएको छ ।

प्रहरीका अनुसार दुर्घटनाग्रस्त स्कार्पियो एसओएस बालग्राम सानोठिमी, भक्तपुरको रहेको र त्यसमा कार्यालयका कर्मचारी सवार रहेका थिए ।

दुर्घटनामा गम्भीर घाइते भएका चालक काठमाडौंको कोटेश्वर निवासी ५४ वर्षीय शक्तिप्रसाद अधिकारीको उपचारका क्रममा मृत्यु भएको प्रहरीले जानकारी दिएको छ ।

स्कार्पियोमा चालकसहित ६ जना सवार थिए । दुर्घटनामा घाइते भएका पाँचजनामध्ये चारजनाको ललितपुर महानगरपालिका–१७ ग्वार्कोस्थित बी एन्ड बी अस्पतालमा उपचार भइरहेको छ भने एकजनाको महाँकाल गाउँपालिका–२ मानिखेल स्वास्थ्य चौकीमा उपचार भइरहेको छ ।

बी एन्ड बी अस्पतालमा कोटेश्वरकी ३९ वर्षीया सस्मिता खतीवडा, नवलपरासीको गैंडाकोट घर भई हाल काठमाडौं बस्ने ३५ वर्षीय भरत पौडेल, बर्दिया घर भई काठमाडौं बस्ने ३६ वर्षीया डिना सोनाहा र नुवाकोट घर भई काठमाडौं बस्ने २६ वर्षीय देवेन्द्रराज पाण्डे छन् ।

काठमाडौंको कीर्तिपुर-५ का ३९ वर्षीय निशान महर्जनको भने मनिखेल स्वास्थ्य चौकीमा उपचार भइरहेको प्रहरीले जानकारी दिएको छ ।