काठमाडौं – देशका विभिन्न स्थानमा वर्षा भइरहेको बीच पछिल्लो एक घण्टामा स्याङ्जाको पञ्चमुलमा सबैभन्दा धेरै वर्षा मापन भएको छ।

मौसम पूर्वानुमान महाशाखाका अनुसार राति ९:४० बजेसम्मको रेकर्ड अनुसार पञ्चमुलमा पछिल्लो एक घण्टामा १३.२ मिलिमिटर वर्षा भएको हो ।

महाशाखाले हाल गण्डकी र सुदूरपश्चिम प्रदेशका थोरै स्थानमा तथा मधेस, कर्णाली, वाग्मती, कोशी र लुम्बिनी प्रदेशका एक–दुई स्थानमा हल्कादेखि मध्यम वर्षा भइरहेको जनाएको छ ।

निरन्तर वर्षाका कारण पहाडी तथा नदी तटीय क्षेत्रमा सतर्कता अपनाउन महाशाखाले आग्रह गरेको छ । वर्षा भइरहेका क्षेत्रमा सडक चिप्लिने, दृश्यता घट्ने तथा साना खोलानाला र नदीमा पानीको बहाव बढ्न सक्ने भएकाले आवश्यक सावधानी अपनाउन सर्वसाधारणलाई अनुरोध गरिएको छ ।