काठमाडौं– कृषि, भूमि व्यवस्था तथा सहकारीमन्त्री गीता चौधरीले मधेश प्रदेशमा सिँचाइको दीर्घकालीन व्यवस्थापन र माटोको उर्वराशक्ति सुधारका लागि विशेष रणनीति ल्याउन लागिएको बताएकी छन्।

आइतबार धनुषा अनुगमनका क्रममा जनकपुरमा आयोजित छलफल तथा अन्तरक्रिया कार्यक्रमलाई सम्बोधन गर्दै मन्त्री चौधरीले कृषि र सिँचाइ मन्त्रालयबीच सहकार्य गरेर एक एकीकृत योजना बनाइने बताइन् ।

उनले सिँचाइ र कृषि अलग–अलग नभई एउटै युनिटका रूपमा अघि बढाउँदा मात्र प्रभावकारी परिणाम आउने उल्लेख गरिन् ।

मन्त्री चौधरीले मधेशको माटोमा रासायनिक मल र विषादीको अत्यधिक प्रयोगका कारण जैविक पदार्थ घट्दै गएकोमा चिन्ता व्यक्त गरिन् ।

उनले माटोको उर्वराशक्ति जोगाउन दीर्घकालीन रुपमा प्राङ्गारिक र जैविक खेतीलाई प्रवर्द्धन गर्न लागिएको बताए ।

यसका लागि नार्क र कृषि आधुनिकीकरण परियोजनाको सहयोगमा १० वटा नमुना पालिका चयन गरी ’माटो सुधार परियोजना’ सञ्चालन गरिने घोषणा गरिन् ।

यस्तै, धनुषाको संरक्षित क्षेत्रलाई समेटेर मधेश प्रदेशमा एउटा प्राणी उद्यान निर्माण गर्ने सोचका साथ अघि बढिएको र प्राविधिक टोलीको अध्ययनपछि प्रक्रिया अघि बढाइने उनले जानकारी दिइन् ।

मन्त्री चौधरीले अनुगमनका क्रममा धनुषाका माछापालक किसान, आँप उत्पादक र सहकारी प्रतिनिधिहरूसँग भेटघाट गरी कृषि प्रविधि र बीउ बिजनको पहुँचबारे जानकारी लिएकी थिइन्।