काठमाडौं- सामाजिक अभियान्ता सोनम वाङचुकले भारतका केन्द्रीय शिक्षामन्त्री धर्मेन्द्र प्रधानको राजीनामालाई लोकतन्त्रको जित भन्दै स्वागत गरेका छन् । सामाजिक सञ्जाल एक्समार्फत प्रतिक्रिया दिँदै उनले यो निर्णय शान्तिपूर्ण जनआन्दोलन र देशभरका युवाहरूको धैर्यताको परिणाम भएको बताएका छन् ।

वाङचुकले यो जित सडकबाट निस्किएको प्रत्यक्ष लोकतन्त्र, शान्ति, धैर्य र निरन्तरको सङ्घर्षको जित भएको उल्लेख गरेका छन् । लोकतन्त्रमा जनताको आवाज नै सबैभन्दा महत्त्वपूर्ण हुने भन्दै नागरिकले शान्तिपूर्ण रूपमा आफ्ना कुरा राख्दा त्यसको प्रभाव देखिने उनले स्पष्ट पारे ।

शिक्षा व्यवस्थामा सुधार र आफ्ना अधिकारका लागि निरन्तर आवाज उठाउने जेन-जी पुस्ताका विद्यार्थी तथा डराएर पनि आन्दोलनलाई समर्थन गर्ने देशभरका नागरिकप्रति उनले आभार व्यक्त गरेका छन् ।

आफ्नो सन्देशको अन्त्यमा उनले अब जवाफदेहिताबाट अघि बढेर सुधारतर्फ लाग्ने समय आएको बताएका छन् । उनका अनुसार शिक्षा मन्त्रीको राजीनामा पहिलो कदम मात्र हो र अब सरकारले परीक्षा प्रणालीमा पारदर्शिता ल्याउन, प्रश्नपत्र बाहिरिने समस्या रोक्न तथा विद्यार्थीको विश्वास पुनः कायम गर्न ठोस कदम चाल्नुपर्छ ।

नीट-यूजी विवाद र देशभर जारी विद्यार्थी आन्दोलनका बीच धर्मेन्द्र प्रधानले राजीनामा दिएका हुन् । सुरुदेखि नै जवाफदेहिता र शिक्षा क्षेत्रमा व्यापक सुधारको माग उठाउँदै आएका अभियान्ता वाङचुकको यो भनाइलाई आन्दोलनकारीहरूका लागि निकै महत्त्वपूर्ण मानिएको छ ।

IT'S A VICTORY OF DEMOCRACY
direct democracy… straight from the streets.
It's a victory of peace, patience & persévérance.
Congratulations CJP, Gen Z of the nation and thank you all citizens for shedding fear and the fear of fear and rising up from every corner of the nation.… pic.twitter.com/rSLOfvba2R

— Sonam Wangchuk (@Wangchuk66) July 25, 2026