काठमाडौं- आईसीसी विश्वकप लिग २ अन्तर्गत दोस्रो खेलमा नेपालले नेदरल्याण्ड्ससँग प्रतिस्पर्धा गरिरहेको छ ।

उट्रेख्टमा जारी खेलमा नेपालले घरेलु टिमलाई १५८ रनको लक्ष्य दिएको छ ।

टस हारेर पहिले ब्याटिङ गरेको नेपालले ४४ ओभर ४ बलमा सबै विकेट गुमाउँदै १ सय ५७ रन बनायो ।

नेपालका लागि आरिफ शेखले सर्वाधिक ४१ रन बनाए । ९० बलको सामना गरेका उनले चार चौका प्रहार गरे । गुलशन झाले ४२ बलमा २९ रन जोडे । दीपेन्द्रसिंह ऐरीले ४२ बलमा २१ रन बनाए भने डा. इशान पाण्डेले १० बलमा चार रन जोडे ।

कप्तान रोहित पौडेलले १२ बलमा तीन रन जोडे । आशिफ शेखले १४ रनको योगदान दिए । अर्का ओपनर कुशल भुर्तेलले २० बलमा ९ रन बनाए ।

नेपाल जारी श्रृङ्खलाको बुधबार भएको खेलमा नामिबियासँग आठ विकेटले पराजित भएको थियो । विश्वकप लिग २ मा २९ खेल खेल्दा नेपाल २४ अङ्कसहित अङ्क तालिकाको छैटौँ स्थानमा छ । नेदरल्यान्ड्स २८ खेलमा ३२ अङ्क जोड्दै अङ्क तालिकाको चौथो स्थानमा छ ।