काठमाडौं – उज्यालो नेपाल पार्टीका अध्यक्ष कुलमान घिसिङले प्रधानमन्त्री बालेन्द्र शाहले प्रतिनिधिसभामा दिएको नेपाल–भारत सीमा सम्बन्धी अभिव्यक्तिप्रति गम्भीर आपत्ति जनाउँदै त्यसबारे स्पष्टिकरण दिन माग गरेका छन् ।

आइतबार प्रतिनिधिसभाको बैठकमा प्रधानमन्त्री शाहले ‘भारतले नेपालको भूमि मिचिरहेको मात्रै नभई नेपालले पनि भारतको भूमि मिचेको’ भन्ने अभिव्यक्ति दिएका थिए । उक्त भनाइप्रति प्रतिक्रिया जनाउँदै घिसिङले सामाजिक सञ्जालमार्फत प्रधानमन्त्रीको अभिव्यक्ति अत्यन्त गम्भीर, संवेदनशील र राष्ट्रिय हितसँग प्रत्यक्ष रूपमा जोडिएको विषय भएको बताएका छन् ।

उनले नेपाल–भारत सीमा विवाद कुनै नयाँ विषय नभएको उल्लेख गर्दै दुवै देशले केही क्षेत्रमा सीमा विवाद रहेको स्वीकार गर्दै आएको र नेपालले ऐतिहासिक दस्तावेज, नक्सा, सन्धि तथा तथ्य–प्रमाणका आधारमा आफ्नो अडान स्पष्ट रूपमा राख्दै आएको स्मरण गराएका छन् ।

घिसिङले सार्वभौम राष्ट्रको प्रधानमन्त्रीले संसदजस्तो सर्वोच्च लोकतान्त्रिक मञ्चबाट दिएको यस्तो अभिव्यक्तिले नेपालको राष्ट्रिय अडान कमजोर बन्न सक्ने, सीमा सम्बन्धी विषयमा अन्तर्राष्ट्रिय स्तरमा भ्रम सिर्जना हुन सक्ने तथा नेपालले उठाउँदै आएको वैध दाबी प्रभावित हुन सक्ने जोखिम रहेको बताएका छन् ।

उनले राष्ट्रिय स्वाभिमान, भौगोलिक अखण्डता र सार्वभौमिकतासँग जोडिएका विषयमा सरकारको धारणा स्पष्ट, जिम्मेवार र प्रमाणमा आधारित हुनुपर्ने उल्लेख गरेका छन् । साथै राष्ट्रिय स्वतन्त्र पार्टीका सभापतिको भारत भ्रमणको पूर्वसन्ध्यामा सोही पार्टीका वरिष्ठ नेता तथा प्रधानमन्त्रीबाट यस्तो अभिव्यक्ति आउनुले थप प्रश्न र आशंका जन्माएको उनको भनाइ छ ।