काठमाडौं – युवाहरूको नेतृत्व, नवप्रवर्तन र सहभागितालाई प्रोत्साहन गर्ने उद्देश्यले आयोजना हुँदै आएको ‘काठमाडौं युथ कन्क्लेभ’को झण्डा विश्वको सर्वोच्च शिखर सगरमाथाको चुचुरोमा फहराइएको छ।

आयोजकका अनुसार हजारौं नेपाली युवाको सपना र आकांक्षाको प्रतीकका रूपमा रहेको कन्क्लेभको झण्डा सगरमाथाको शिखरसम्म पुर्‍याइएको हो। यसलाई नेपाली युवाको ऊर्जा, सम्भावना र विश्वमञ्चमा स्थापित हुने आकांक्षाको महत्वपूर्ण उपलब्धिका रूपमा हेरिएको छ।

कार्यक्रम आयोजकले झण्डा सगरमाथाको चुचुरोसम्म पुर्‍याउन योगदान गरेको एलिट एक्सेडप्रति आभार व्यक्त गर्दै यसले केवल एउटा झण्डा मात्र नभई नेपाली युवाको आशा, सपना र भावनालाई विश्वको सर्वोच्च स्थानसम्म पुर्‍याएको उल्लेख गरेको छ।

यसैबीच, आयोजकले आगामी कार्यक्रममा स्वयंसेवकका रूपमा सहभागी हुन इच्छुक युवाहरूलाई आवेदन दिन आह्वान गरेको छ। कार्यक्रममा स्वयंसेवक बनेर अविस्मरणीय अनुभव सिर्जना गर्ने अवसर रहेको उल्लेख गर्दै युवाहरूलाई अभियानमा जोडिन आग्रह गरिएको छ।