काठमाडौं- पाकिस्तानमा अल्पसंख्यक अहमदिया समुदायमाथि इद उल अजहा (बकरइद) पर्व मनाउन रोक लगाइएको भन्दै बेलायतस्थित एक इसाई संस्था र विश्वव्यापी मानवअधिकारवादी समूहले गम्भीर चिन्ता व्यक्त गरेका छन् । पाकिस्तानभर अहमदिया अल्पसंख्यक समुदायले धम्की र दुर्व्यवहारको सामना गर्नु परिरहेको रिपोर्ट सार्वजनिक भइरहँदा यस्तो चिन्ता व्यक्त गरिएको हो ।

अहमदिया समुदायका प्रवक्ता अमिर महमूदका अनुसार पाकिस्तानमा इद मनाइने अघिल्लो साँझ नै कराँचीका अहमदीका घरहरूबाट प्रहरीले कुर्बानीका लागि राखिएका खसीबोकाहरू जफत गरेको छ । सन् २०२३ को जनगणना अनुसार पाकिस्तानमा १ लाख ६२ हजारभन्दा बढी अहमदियाहरू छन् । उनीहरूलाई विगत केही दिनदेखि लगातार प्रहरी चौकीमा बोलाएर जनावर बलि नदिन र इदका कार्यक्रमहरू आयोजना नगर्न दबाब दिँदै कागज गराउने कार्य भइरहेको छ ।

अहमदिया समुदाय १९ औं शताब्दीमा ब्रिटिस भारतमा सुरु भएको समूह हो, जसले आफूलाई मुस्लिम मान्दछ। तर परम्परावादी मुस्लिम समूहहरूले उनीहरूलाई मुस्लिम स्वीकार गर्दैनन् । पाकिस्तानको कानुनले पनि अहमदियाहरूलाई आफूलाई मुस्लिम भन्न वा आफ्नो धार्मिक अभ्यासमा इस्लामिक प्रतीकहरू प्रयोग गर्न कानुनी रूपमा प्रतिबन्ध लगाएको छ।

बेलायतस्थित ‘क्रिश्चियन सोलिडारिटी वर्ल्डवाइड’ (सीएसडब्लु) का दक्षिण एसिया उप-टोली नेता सेसिल शेन चौधरीले यो प्रतिबन्धको कडा निन्दा गरेका छन् । उनले हरेक वर्ष अहमदिया समुदायले गैर-राज्य पक्षबाट मात्र नभई राज्यका निकायहरूबाटै यस्तो प्रतिबन्ध भोग्नुपर्नु दुःखद भएको बताएका छन् ।

उनले यो दुर्व्यवहार अब संस्थागत बन्दै गएकोमा चिन्ता व्यक्त गर्दै हरेक व्यक्तिको धार्मिक स्वतन्त्रताको सम्मान गर्न पाकिस्तान सरकारसँग माग गरेका छन् ।