काठमाडौं– मोरङको बुढीगंगा गाउँपालिकामा पहिलो पटक बुढीगंगा गोल्ड कप फुटबल प्रतियोगिता आयोजना हुने भएको छ । 

प्रतियोगिता आगामी चैत्र २१ गतेदेखि २७ गतेसम्म गाउँपालिका–२ स्थित अमाही खेल मैदानमा सञ्चालन हुने आयोजकले जनाएको छ । बुढीगंगा गाउँपालिकाको आयोजनामा हुन लागेको उक्त प्रतियोगितामा नेपाल र भारतका गरी ८ वटा टिमको सहभागिता रहनेछ । 

प्रतियोगितामार्फत युवाहरुलाई खेलकुदतर्फ आकर्षित गर्दै अनुशासित बनाउने र बुढीगंगालाई फुटबलको उर्वर भूमि बनाउने उद्देश्य राखिएको गाउँपालिका अध्यक्ष जीत नारायण थापामगरले जानकारी दिए ।

मंगलबार बुढीगंगामा आयोजित पत्रकार सम्मेलनमा बोल्दै अध्यक्ष थापामगरले गोल्ड कपलाई आगामी वर्षहरूमा पनि निरन्तरता दिने योजना रहेको उल्लेख गरे । 

प्रतियोगिता सञ्चालनका लागि करिब ३९ लाख रुपैयाँ खर्च लाग्ने अनुमान गरिएको छ । प्रतियोगिताको विजेताले ५ लाख रुपैयाँ नगदसहित ट्रफी, मेडल र प्रमाणपत्र प्राप्त गर्नेछ भने उपविजेताले २ लाख ५० हजार रुपैयाँ नगदसहित ट्रफी पाउनेछ ।