गोरखा– गोरखाको चुमनुब्री गाउँपालिका–छेकम्पार चौरीखर्क क्षेत्रमा ठूलो पहिरो खस्दा बूढीगण्डकी नदीको सहायक स्यार खोला थुनिएको छ।

स्थानीयबाट प्राप्त जानकारीअनुसार सोमबार पहिरो खसेपछि छेकम्पारबाट बूढीगण्डकीतर्फ बग्ने खोला केही समय अवरुद्ध भएको थियो।

खोला थुनिएपछि तल्लो तटीय क्षेत्रमा जोखिम बढ्न सक्ने भन्दै स्थानीयलाई सतर्क रहन आग्रह गरिएको छ ।

पछिल्लो जानकारीअनुसार पहिरोका कारण थुनिएको खोला अहिले बिस्तारै पुनः बग्न थालेको बताइएको छ । यद्यपि, पहिरो थप खस्न सक्ने तथा नदीको बहावमा अचानक परिवर्तन आउन सक्ने सम्भावनालाई ध्यानमा राख्दै तटीय क्षेत्रमा बसोबास गर्नेहरूलाई उच्च सतर्कता अपनाउन भनिएको छ ।

धादिङ हुँदै गोरखातर्फ बग्ने बुढीगण्डकी नदी आसपासका बासिन्दालाई खोला तथा नदी किनारमा नजान र सुरक्षित स्थानमा रहन आग्रह गरिएको छ ।

प्रारम्भिक विवरणअनुसार घटना गोरखाको चुमनुब्री क्षेत्रमा पहिरोका कारण बूढीगण्डकीको सहायक स्यार खोला केही समय थुनिएको हो ।