डल्लास– अविरल वर्षा र बाढी-पहिरोका कारण देश शोकमा डुबिरहेका बेला प्रवासमा रहेका नेपाली युवा दीर्घकालीन उद्धार तथा पुनर्निर्माणमा जुटेका छन् । 

मूल घर गोरखाको पालुङटार भई हाल अमेरिकाको डल्लासमा बसोबास गर्दै आएका युवाहरूको पहलमा ‘भिजिट नेपाल’ र ‘युथ एन्ड डेभलपमेन्ट’ को संयुक्त आयोजनामा कुल ३ करोड नेपाली रुपैयाँ बराबरको राहत तथा पुनर्निर्माण कोष घोषणा गरिएको छ ।

अभियानको नेतृत्व गरिरहेका ‘भिजिट नेपाल’ का अध्यक्ष तथा युवा उद्यमी राजीव राजभाटले व्यक्तिगत तर्फबाट तत्काल आपत्कालीन सहायता स्वरूप ३० लाख रुपैयाँ प्रधानमन्त्री दैवी प्रकोप राहत कोषमा जम्मा गराइसकेका छन् । 
 
जनैपूर्णिमाको अवसरमा गोसाइँकुण्ड मेला भर्न गएका राजीव राजभाटका आफ्नै निकटतम आफन्तका साथै पालुङटार र नौखरेका ३० जनाभन्दा बढी प्यारा छिमेकीहरू पहिरोमा परी अझै बेपत्ता छन् । 
 
विश्वभर रहेका प्रत्येक नेपालीको भावनात्मक सहभागिता दर्शाउने हेतुले एक नेपाली, एक रुपैयाँ’ को अवधारणासहित यो ३ करोडको कोष खडा गरिएको हो । 

राजभाटले सुरुवाती चरणमै बुझाएको ३० लाख रुपैयाँले तत्कालको आपत्कालीन उद्धार कार्यमा सहयोग पुर्‍याउनेछ । बाँकी रकम भने ‘भिजिट नेपाल’ र ‘युथ एन्ड डेभलपमेन्ट’ को व्यवस्थापनमा बाढी प्रभावित क्षेत्रका भत्किएका पूर्वाधार निर्माण, विस्थापित परिवारको पुनर्स्थापना तथा पीडित बालबालिकाको शिक्षा र स्वास्थ्य क्षेत्रमा दीर्घकालीन योजनाअन्तर्गत पारदर्शी रूपमा परिचालन गरिनेछ।