कञ्चनपुर – कञ्चनपुरको बेलौरी नगरपालिका–१० सडकघाटस्थित नेपाल–भारत सीमा क्षेत्रबाट ब्राउन सुगरसहित चार जना पक्राउ परेका छन् ।

बिहीबार दिउँसो सशस्त्र प्रहरी बल नेपाल बिओपी भुडाबाट सशस्त्र प्रहरी निरीक्षक कृष्ण बहादुर घिमिरेको कमाण्डमा खटिएको पाँच सदस्यीय सीमा पैदल गस्ती टोली र प्रहरी चौकी भुडाबाट प्रहरी वरिष्ठ हवल्दार कृष्णराज जोशीसहितको संयुक्त टोलीले शंका लागेर अटो रिक्सामा चेकजाँच गरेको थियो ।

चेकजाँचका क्रममा सु.प.प्र. ०१००१ ह ८४४३ नम्बरको अटो रिक्साको पछाडिको सिटमा कालो प्लास्टिकभित्र लुकाएर राखिएको अवस्थामा ब्राउन सुगर (खैरो हिरोइन) जस्तो देखिने लागूऔषध ६.५ ग्राम फेला परेको प्रहरीले जनाएको छ ।

सो क्रममा अटो चालक कञ्चनपुर बेलडाडी गाउँपालिका–२ सिहपाल टोलका ४७ वर्षीय करन ओखेडासहित बेदकोट नगरपालिका–८ भासीका १८ वर्षीय ललित सेट्टी, १९ वर्षीय अशोक डगौरा र १८ वर्षीया ममता सार्कीलाई नियन्त्रणमा लिइएको हो ।

नियन्त्रणमा लिइएका सबैलाई आवश्यक कानुनी कारवाहीका लागि प्रहरी चौकी भुडामा बुझाइएको र थप अनुसन्धान भइरहेको प्रहरीले जनाएको छ ।