काठमाडौं– मन्त्रिपरिषद्को बैठक सिंहदरबारमा सुरू भएको छ । प्रधानमन्त्री बालेनको सचिवालयका अनुसार बैठक अपराह्न सवा ४ बजे प्रधानमन्त्री तथा मन्त्रिपरिषदको कार्यालय सिंहदरबारमा सुरू भएको हो ।

यस बैठकले विगतको सरकारमा पालामा भएका राजनीतिक नियुक्तिसहितका विषयमा महत्त्वपूर्ण निर्णय गर्न सक्ने अपेक्षा गरिएको छ।

अर्कातिर भ्रष्टाचारविरुद्धको अभियान तीव्र पारेको सरकारले यसबारे पनि ठोस निर्णय गर्न सक्ने चर्चा छ ।

शुक्रबार नयाँ सरकार गठन भएपछि यो दोस्रो मन्त्रिपरिषद बैठक हो । यसअघि सरकार गठनकै दिन शुक्रबार पहिलो बैठक बसेको थियो ।

पहिलो दिनको बैठकले गत भदौ २३ र २४ गते भएको जेन-जी आन्दोलनमा भएको घटनाको छानबिन आयोगले बुझाएको प्रतिवेदन तत्काल कार्यान्वयन गर्ने निर्णय गरेको थियो ।

उक्त निर्णयअनुसार तत्कालीन प्रधानमन्त्री ओली र पूर्वगृहमन्त्री रमेश लेखकलाई पक्राउ गरी अनुसन्धान सुरु गरिसकेको छ ।

यस्तै पहिलो दिनको बैठकले एक सय बुँदे कार्यसूची पारित गरेको थियो । आजको बैठकले पनि महत्त्वपूर्ण निर्णय गर्ने अनुमान छ ।