काठमाडौं– एउटा बिहान उठ्दा श्रीमान् र श्रीमतीले आफूलाई आफ्नै शरीरमा भेटेनन् भने के होला ? यही अनौठो प्रश्नले दर्शकलाई उत्सुक बनाउने फिल्म हो ‘परिवार’ । 

अभिनेता कामेश्वर चौरासिया र लक्ष्मी बर्देवाको अस्वाभाविक गेटअपबाटै चर्चा कमाएको यो फिल्मको टिजर सार्वजनिक भएसँगै यसको कथालाई लिएर कौतुहलता झनै बढेको छ । 

पोस्टरबाटै दर्शकमा प्रश्न उठाएको फिल्मको टिजरले भने कथाभित्रको पारिवारिक सम्बन्ध र रोचक ट्विस्टतर्फ संकेत गरेको छ।

मदन थापाको निर्देशनमा बनेको टिजरको सुरुवात कामेश्वर र लक्ष्मीबीचको विवादबाट हुन्छ । उनीहरूको संवादले परिवारको सहमतिबिना विवाह गरेर सँगै आएको र त्यसपछि सम्बन्धमा समस्या बढेको संकेत गर्छ । 

लक्ष्मीले कामेश्वरलाई आफ्नो विश्वासमा परिवार छाडेर आएको बताउँदा कामेश्वरले पनि उनको चाहना र जीवनशैलीलाई लिएर प्रश्न उठाएको देखिन्छ ।

फिल्ममा उनीहरूको छोरीको भूमिकामा रहेकी पात्र पनि महत्त्वपूर्ण देखिन्छिन् । आमाबुवाबीचको झगडाबाट चिन्तित उनले भगवान्सँग उनीहरूबीच कहिल्यै विवाद नहोस् भनेर प्रार्थना गरेको दृश्य टिजरमा समावेश छ ।

तर टिजरको सबैभन्दा रोचक पक्ष भने त्यसपछि देखिन्छ। बिहान उठेपछि कामेश्वर र लक्ष्मी दुवै आफ्नो शरीर छाम्दै अचम्ममा परेको दृश्यले फिल्मको कथालाई नयाँ मोडमा पुर्‍याउँछ । 

उनीहरू किन एक अर्काको जस्तो गेटअपमा देखिएका छन् र शरीरमा के परिवर्तन भएको हो भन्ने कुरा भने टिजरले खुलाएको छैन। यही रहस्यले फिल्मप्रति दर्शकको चासो थप बढाएको छ ।

‘कहिले श्रीमानको वार, कहिले श्रीमतीको वार, मिल्दै जाँदा बन्यो परिवार’ भन्ने नारासहित निर्माण भएको फिल्म कार्तिक १३ गतेदेखि प्रदर्शनमा आउनेछ।

शाही फिल्म प्रोडक्सन र विशआई फिल्म्सको सहकार्यमा बनेको फिल्ममा कामेश्वर र लक्ष्मीसँगै विनिता बस्नेत, लुनिभा तुलाधर, लक्ष्मीनाथ तिमिल्सिना, बारिश सोना र प्रियान्शु थापालगायत कलाकारको अभिनय छ।

प्रेम थापा र गणेश उपाध्यायको लेखन रहेको फिल्मका निर्माता रमेश शाही हुन् । कैलाश रावल कार्यकारी निर्माता र आरम्भ रिजाल सह–निर्माताका रूपमा छन्। फिल्मको टिजर म्युजिक नेपालको युट्युब च्यानलमार्फत सार्वजनिक गरिएको हो।