काठमाडौं– छोरीको जीवनसँग जोडिएको निर्णयमा उनको इच्छा कति महत्त्वपूर्ण हुन्छ ? यही प्रश्नलाई कथाको केन्द्रमा राखेर बनेको नेपाली फिल्म ‘अक्षरा’ आगामी शुक्रबार, असोज २३ गतेदेखि देशभरका सिनेमा घरमा प्रदर्शनमा आउने भएको छ।

निर्देशक विनयराज पौडेलको निर्देशनमा तयार भएको फिल्मले परिवारको दबाबमा छोरीको इच्छा विपरीत विवाह गराउँदा त्यसले परिवारभित्र मात्र होइन, समाजमा समेत पार्न सक्ने प्रभावलाई कथामार्फत प्रस्तुत गरेको छ। पारिवारिक सम्बन्ध, सामाजिक सोच र व्यक्तिगत इच्छाबीचको द्वन्द्व फिल्मको मुख्य विषय बनेको निर्माण पक्षले जनाएको छ।

‘अक्षरा’ले केन्द्रीय चलचित्र जाँच समितिबाट ‘युनिभर्सल’ (यू) प्रमाणपत्र पाइसकेको छ । त्यसैले फिल्म सबै उमेर समूहका दर्शकले हेर्न पाउनेछ ।

‘क्षित बाबु प्रोडक्सन हाउस’को ब्यानरमा निर्माण भएको फिल्ममा सुशील सिटौला, न्यान्सी खड्का, सुशील पोखरेल, अंशु महर्जन, पुष्कर राउत, रिस्ता अधिकारी, उत्तम केसी र गीता अधिकारीलगायत कलाकारको अभिनय छ ।

सोनी थापा (ढुङ्गाना) प्रस्तुतकर्ता रहेको फिल्मको कथा निर्माता उग्रसेन ढुङ्गानाले तयार पारेका हुन् । पटकथा तथा संवाद अभिमन्यु निरवी र निर्देशक पौडेलले लेखेका छन् । 

फिल्ममा दिपेन बस्न्यातको छायाङ्कन, गौतम खड्काको सम्पादन, रामजी लामिछानेको नृत्य निर्देशन र कर्णराज गिरीको संगीत छ । फिल्मको नेपालभर वितरण नेसनल सिने ग्रुप नेपालका तर्फबाट दीपक दंगालले गर्नेछन् ।

सामाजिक विषयलाई पारिवारिक कथासँग जोडेर प्रस्तुत गरिएको ‘अक्षरा’ले अभिभावकको निर्णय र सन्तानको इच्छाबीचको सम्बन्धलाई पर्दामा कसरी प्रस्तुत गरेको छ, त्यसका लागि भने असोज २३ गतेपछि दर्शकले नै मूल्यांकन गर्नेछन् ।