काठमाडौं– भारतको आर्थिक सहयोगमा नासोँ गाउँपालिकामा अस्पताल भवन निर्माण हुने भएको छ।

मनाङ जिल्लाको नासोँ गाउँपालिका–५ मा निर्माण हुने अस्पताल भवनको बुधबार भारतीय राजदूतावासका नियोग उप–प्रमुख राकेश पाण्डे र पालिकाका अध्यक्ष धनबहादुर गुरूङले संयुक्त रूपमा शिलान्यास गरेका हुन्।

भारतीय राजदूतावासका अनुसार करिब ५ करोड ६० लाख रुपैयाँको लागतमा निर्माण हुने अस्पताल भवन उच्च प्रभाव सामुदायिक विकास परियोजना अन्तर्गत निर्माण गरिन लागिएको हो।

परियोजना नासोँ गाउँपालिकामार्फत कार्यान्वयन हुनेछ।
शिलान्यास कार्यक्रममा गाउँपालिकाका अध्यक्ष गुरुङसहित स्थानीय सरोकारवालाहरूले भारत सरकारले नेपालमा गर्दै आएको विकास सहयोगको प्रशंसा गरेका थिए।

उनीहरूले नयाँ अस्पताल भवन निर्माणपछि नासोँ गाउँपालिकामा स्वास्थ्य सेवाको पहुँच थप सहज र प्रभावकारी बन्ने विश्वास व्यक्त गरेका छन्।

राजदूतावासले नेपाल र भारतबीच नजिकको छिमेकी सम्बन्ध तथा बहुक्षेत्रीय सहकार्य कायम रहेको उल्लेख गर्दै उच्च प्रभाव सामुदायिक विकास परियोजनामार्फत् पूर्वाधार विकास, स्थानीय तहको सशक्तीकरण र नेपाल सरकारको विकास तथा समृद्धिको प्रयासमा सहयोग निरन्तर रहने जनाएको छ।