काठमाडौं- सामाजिक सञ्जालमार्फत धार्मिक भावनामा आघात पुग्ने तथा धार्मिक सद्भाव भड्काउने अभिव्यक्ति दिएको आरोपमा प्रहरीले एक जनालाई पक्राउ गरेको छ ।

जिल्ला प्रहरी परिसर काठमाडौंका अनुसार ‘मठ-मन्दिरमा आगो लाइदिन्छौं’ लगायतका अभिव्यक्ति दिएको अभियोगमा ती युवक पक्राउ परेका हुन्।

उक्त विवादित भिडियो सामाजिक सञ्जालमा सार्वजनिक भएपछि रुकुम पश्चिमको आठविसकोट नगरपालिका–१२ घर भई हाल काठमाडौंको टोखा नगरपालिका–८ बानियाँटार बस्दै आएका २७ वर्षीय जनक परियारलाई प्रहरीले पक्राउ गरेको हो ।

परियार भदौ २०८२ को आन्दोलनपछि गठित जेन-जी युनाइटेडका संयोजक पनि हुन् । सुशीला कार्की नेतृत्वको अन्तरिम सरकार हुँदा उनि सिंहदरबारतिर धाइरहन्थे ।

उनले त्यसबेला अर्थमन्त्री रामेश्वर खनालसहितलाई भेट्दै विभिन्न माग राखेर ज्ञापन पत्र बुझाउँथे। जेन-जी युनाइटेडका नाममा उनी बेला बेला उग्र भाषण दिन्थे। तर पछिल्लो पटक उनले सामाजिक र जातीय सद्‍भाव नै भड्किने अभिव्यक्ति दिएपछि प्रहरीले समातेको हहो ।

प्रहरीले उनीमाथि थप अनुसन्धान भइरहेको जनाएको छ । जिल्ला प्रहरी परिसर काठमाडौंका प्रवक्ता तथा सूचना अधिकारी प्रहरी उपरीक्षक पवनकुमार भट्टराईका अनुसार धार्मिक सद्भाव बिग्रने खालका गतिविधि गरेको पाइएपछि परियारलाई पक्राउ गरिएको हो ।