काठमाडौं– बलिउड चलचित्र ‘डन ३’ लाई लिएर अभिनेता रणवीर सिंह र निर्देशक–निर्माता फरहान अख्तरबीच देखिएको मतभेद यतिबेला चर्चामा छ । चलचित्रको भविष्य नै अन्योलमा पर्ने गरी बहस बढिरहेका बेला सुपरस्टार सलमान खान विवाद समाधानका लागि सक्रिय बनेका छन्।

भारतीय सञ्चारमाध्यमका अनुसार सलमान खानले व्यक्तिगत रूपमा रणवीर सिंह र फरहान अख्तर दुवैसँग फोनमा संवाद गर्दै विवादलाई शान्तिपूर्ण रूपमा समाधान गर्न आग्रह गरेका छन् । 

उद्योगभित्रको मतभेदले अनावश्यक रूपमा ठूलो रूप नलियोस् भन्ने उद्देश्यले उनले ‘मिडिया सर्कस’ भन्दा पनि आपसी समझदारीलाई प्राथमिकता दिन सुझाव दिएका हुन् ।

स्रोतका अनुसार सलमान रणवीर सिंहसँग नजिकको सम्बन्धमा छन् भने अख्तर परिवारसँग पनि उनको लामो समयदेखिको सम्बन्ध रहेको छ । यही कारण उनले दुवै पक्षको कुरा ध्यानपूर्वक सुनेका छन् । 

फरहानसँगको कुराकानीमा सलमानले फिल्म क्षेत्रमा ‘क्रिएटिभ डिफरेन्स’ सामान्य विषय भएको उल्लेख गरेका थिए । उता रणवीरसँग उनले लामो छलफल गर्दै अभिनेता पक्षको असन्तुष्टि र सोच बुझ्ने प्रयास गरेका थिए ।

सलमानले दुवैलाई ‘हामी एउटै उद्योगका मान्छे हौं’ भन्ने भावना राखेर अघि बढ्न सुझाव दिएको बताइएको छ । साथै अहिलेको तनाव समाधान भएपछि भविष्यमा फेरि नयाँ प्रोजेक्टमा सहकार्य गर्न पनि उनले आग्रह गरेका छन् ।

रिपोर्टअनुसार सलमानको पहलपछि रणवीर र फरहान दुवै शान्त ढंगले समाधान खोज्ने पक्षमा देखिएका छन् । उनीहरू कानुनी विवाद, फिल्म संस्थाको हस्तक्षेप वा सार्वजनिक आरोप–प्रत्यारोपको अवस्था आउन नदिन चाहन्छन् ।

यस्तै, सलमान खानले फरहानलाई सम्भावित आर्थिक क्षतिबारे साथ दिइरहेका छन् भने रणवीरलाई ‘धुरन्धर’ को सफलतालाई निरन्तरता दिँदै नयाँ प्रोजेक्टमा केन्द्रित हुन प्रेरित गरिरहेका छन् ।

बलिउडमा कलाकारबीचका विवादले विगतमा धेरैपटक ठूलो रूप लिएको इतिहास छ । तर यसपटक भने सलमान खानको ‘शान्तिदूत’ भूमिकाले ‘डन ३’ विवादलाई नयाँ मोड दिएको चर्चा सुरु भएको छ ।