काठमाडौं – विश्वको सर्वोच्च शिखर सगरमाथाको पहिलो सफल आरोहणको सम्झनामा मनाइने ‘सगरमाथा दिवस’ विशेष कार्यक्रम आज विभिन्न कार्यक्रमसहित आयोजना गरिएको छ । 

नेपाल पर्यटन बोर्ड तथा सम्बन्धित सरोकारवाला निकायहरूको संयुक्त रुपमा आयोजना गरिएको  कार्यक्रम  कर्मचारी सञ्चय कोष परिसरबाट प्रभातफेरि गरी जमलस्थित नाचघरमा पुगी औपचारिक कार्यक्रम गरिएको हो । 

उद्‌घाटन समारोहमा संस्कृति, पर्यटन तथा नागरिक उड्डयन मन्त्री प्रमुख अतिथिका रूपमा सहभागिता रहेको थियो  ।  कार्यक्रममा सगरमाथा आरोहण, पर्यटन तथा हिमाल संरक्षण क्षेत्रमा योगदान पुर्‍याएका विभिन्न विशिष्ट व्यक्तित्वहरूको सम्मान तथा अभिवादन समेत गरिएको थियो ।

हरेक वर्ष मे २९ तारिखका दिन सगरमाथा दिवस मनाउने गरिन्छ । सन् १९५३ मा यही दिन न्यूजिल्यान्डका सर एडमन्ड हिलारी र नेपाली शेर्पा तेन्जिङ नोर्गेले पहिलो पटक सगरमाथाको सफल आरोहण गरेका थिए । त्यसयता यो दिन नेपालमा विशेष महत्वका साथ मनाइँदै आएको छ ।